חלק יו"ד - ב'תתקע
ברכה ושלום רב!
געפינענדיג זיך יעצט אין די טאג פון עשרת ימי תשובה, וואס אויף די טאג זאגט דער נביא, דרשו ה' בהמצאו קראוהו בהיותו קרוב - נאך מער ווי א גאנץ יאהר, איז, אלס צוגאב צו מיין בריף פון אמאל, וויל איך צוגעבען די ווייטערדיקע שורות:
בעזרת השם יתברך זיינען לעצטענס אנגענומען געווארען באשטימטע אויפפירונגען און הנהגות צווישען אנ"ש, און פרויען פון אנ"ש בפרט, וואס ביז איצטער, צוליב פערשידענע סיבות, האבען דאס ניט אלע אנגעהאלטען
אזוי ווי יעדע זאך וואס איז ניי אין דעם ארט, איז דאס גרינג צו צושטערען ח"ו, און דעריבער איז אויסערגעוויינליך גרויס דער זכות פון יעדען איינעם וועלכער טראגט צו זיין טייל צו שטארקען דאס. פון דער אנדער זייט - איז דאס גרינגער דורכפירן מיט זיך אליין - אויב אפילו ביז יעצט האט מען דאס ניט אפגעשאצט לויט דער אמת'ער וויכטיקייט - נעמענדיק אין בעטראכט, אז דאס איז ניט א פריוואטע אנגעלעגנהייט נאר עס האט א השפעה, אין א געוויסער מאס, אויף דעם גאנצען קרייז
דעריבער, ניט אריינגייענדיק אין די סיבות וואס האבען ביז יעצט אפגעהאלטען די איינפירונג פון בעשטימטע ענינים אין די הייזער פון אנ"ש, אין לבושים און אין חינוך הבנים, וויל איך נאך אמאל אויפמערקזאם מאכען אייך, אז פון היינט אן און ווייטער, האבן אלע, אן אויסנאם, געדארפט פאראייניגען זיך מיט די פרויען פון אנ"ש, וועלכע טראגען שייטלען, גיבען די קינדער א אמת חסידישן חינוך, און פירן א אמת חסידיש הויז בכל הפרטים. און השי"ת זאל אייך העלפן - אז איר זאלט זעהען דעם אמת, אז עס איז ניט אזא שווערע זאך, און עס איז ניט א זאך וואס מען דארף זיך מיט דעם שעמען ח"ו. אין געגען טייל - איר זאלט זיין שטאלץ מיץ דעם, וואס מי האט די שטארקייט ניט צו שעמען זיך, מיט דעם וואס גייענדיק אין גאס וועלען חבר'טעס און פריינדינעס דערקענען אז דא גייט א אידישע פרוי וועלכע האלט זיך אין דת משה וישראל, און אויף אזויפיל - אז זי וויל דאס ניט אויסבאהאלטען, און זייט שטאלץ, וואס אייערע קינדער ווייסען, אז זיי זיינען אנדערש מכל הגוים, און זיי האבען באקומען די תורה, תורת חיים, און לערנען זי אלס איינציקער יסוד פון זייער חינוך
וואס נאר נאך דעם לייגען דעם יסוד פון א בנין און באפעסטיגען עס א באשטימטע צייט, אן קיינע בלבולים און שטערונגען פון אנדערע למודים, קען מען טראכטן וועגן ווייטערדיקען חינוך
און דער זכות פון אננעמען א פעסטען באשלוס אין דעם - מיטן גאנצן הארצען און מיט פרייד, און גלייך אנהייבען פארווירקליכען דאס אין לעבן, זאל בריינגען און וועט בריינגען א חתימה און א גמר חתימה טובה - ביום הקדוש, הושענא רבא און שמיני עצרת, הבע"ל - אייך און אלע אייערע בני בית שיחיו
בברכת חתימה וגמר חתימה טובה, המחכה לבשו"ט בכל הנ"ל בקרוב
Notes:
נדפסה בלקו"ש חכ"ג ע' 943 והושלמה ע"פ העתק המזכירות
האגרת נשלחה לכמה נשים וארגוני נשים
מיין בריף פון אמאל: ראה לעיל ח"ט אגרת ב'תתסט ובכ"מ
שייטלען: ראה גם לעיל ח"ט אגרת ב'תרלז, ובהנסמן בהערות שם. לקמן ג'נג. ג'קנא ג'קעא ג'רסו.
